ШИНИЙГ ЭРЭЛХИЙЛСЭН ОНЦЛОГТОЙ СУРГАЛТААС
  • 13:36
  • 87
Улсын хил хамгаалалтын чухал бүрэлдэхүүн хэсэг, Хил хамгаалах байгууллагын гурван эрхэм дарга нарын нэг хилийн салбарын дарга нарын цугларалтыг зохион байгууллаа. Хилийн 0275 дугаар ангийн хамт олон ололт амжилт, алдаа дутагдлаа хамтдаа дэнсэлж, нэгэн оны туршид хэрхэн ажилласан, цаашид юуг хийж бүтээхээ хэлэлцсэн нь энэ билээ.

Хошууч Ц.Бат-Эрдэнэ

Монгол Улсын хил хамгаалалтыг 2020 онд зохион байгуулах тухай Хилийн цэргийн командлагчийн удирдамж, ангийн даргын тушаал, энэ онд дэвшүүлсэн зорилт, удирдлагаас баримтлах бодлого чиглэлийг хэрхэн биелүүлэх, хилийн салбарын дарга нарын мэдлэг, ур чадварыг дээшлүүлэх зорилготойгоор тус арга хэмжээ зохион байгуулагдсан юм. Танхимын болон хээрийн хичээлүүдийг хослуулсан цугларалт Хил хамгаалах байгууллага, ангиас 2019 онд авч хэрэгжүүлсэн арга хэмжээ, 2020 онд баримтлах бодлого чиглэл, Хил хамгаалах байгууллагын удирдах ажилтнуудын цугларалтын талаар мэдээллийг хүргэснээр эхэллээ. Хил хамгаалах байгууллагын 2016-2019 оны үйл ажиллагааны үр дүнг ангийн захирагч, хурандаа Б.Гантөгс танилцуулж, цугларалтын хичээл сургалтыг хөтөлбөр төлөвлөгөөний дагуу нийт 12 цагийн танхимын сургалт, найман цагийн штабын дадлагыг ”Улсын хил хамгаалалтыг удирдах, зохион байгуулах”, “Хойшлуулашгүй мөрдөн шалгах болон зөрчил шалган шийдвэрлэх ажиллагаа” сэдвээр хээрийн байрлалд тус тус зохион байгууллаа.

Мөн энэ үеэр хил хамгаалалтад туслах хүчний гишүүдийн цугларалтын арга хэмжээг зохион байгуулж Дорнод аймгийн Баян-Уул, Баяндун, Дашбалбар, Чулуунхороот сумдын Засаг дарга, тамгын газрын дарга нар болон хил хамгаалалтад туслах хүчний гишүүд оролцлоо. Улмаар ХХТХСЗ-үүдтэй 2020 онд хамтран ажиллах төлөвлөгөөг хэлэлцэж, дөрвөн цагийн сургалт явуулж, ХХТХГ-дэд шинээр үнэмлэх, энгэрийн тэмдгийг гардуулан өгөн амжилт хүсэв.

Цугларалтын үеэр харилцан ажиллагаатай Дорнод аймгийн Мэргэжлийн сургалт, үйлдвэрлэлийн төвтэй хамтран “Удирдах ажилтны манлайлал”, “Хувь хүний хөгжил” сэдвүүдээр гурван цагийн сургалт зохион байгуулж, цаашид хилийн салбаруудтай барилга, засал чимэглэлийн ажилд туслалцаа үзүүлэх хамтран ажиллах талаар Дорнод аймгийн Мэргэжлийн сургалт, үйлдвэрлэлийн төвийн сургалтын менежер Б.Эрдэнэ салбарын захирагч нартай гэрээ байгуулж, баталгаажуулсан юм. Цугларалтын бас нэгэн шинэлэг ажлыг энд цохон тэмдэглэхэд хооллолтын арга хэмжээг өөртөө үйлчилж, хүссэн зоогоо барих буюу сонголтын хоолны системийг анх удаа туршсан нь оролцогчдод ихэд таалагдсан юм. Мөн ангийн Сэтгэлзүй, мэдээлэл, соёл сурталчилгааны албанаас хилийн салбарын дарга нарын албаны ачаалал, чөлөөт цагийг зөв боловсон өнгөрүүлэх зорилгоор салбарын дарга, ангийн төвийн офицеруудын дунд “ТВ-Караоке”, “800.000 төгрөгийн уналт” зэрэг танин мэдэхүй, хөгжөөнт уралдаан тэмцээн зохион байгуулан, “Хилчний жавхаа” урлагийн тоглолтыг сонирхуулж, ангийн “Мөнгөн өвөл-2019” шинэ жилийн баярын цэнгүүнд цугларалтын бүрэлдэхүүнийг оролцуулав. Шинэлэг, шинийг эрэлхийлсэн цугларалтын үйл ажиллагаа мэдлэг, мэдээллээр цэнэглэгдсэн оролцогчид сурсан, сонссон, үзсэн, харсан, эзэмшсэн бүхнээ түгээн дэлгэрүүлэх, албанд мөрдөх, хэрэгжүүлэх, илүү ихийг хийж бүтээх эрмүүн хүслээр өндөрлөлөө.

Сэтгэгдэл үлдээх
Сэтгэгдэлүүд (0)

Сэтгэгдэл байхгүй байна.