Улсын хилийн халдашгүй дархан байдлыг хангах, Монгол Улсын хилийн хууль тогтоомж, хилийн асуудлаар байгуулсан Монгол Улсын олон улсын гэрээг хэрэгжүүлэх, хилийн зөрчлөөс урьдчилан сэргийлэх, илрүүлэх, таслан зогсоох үйл ажиллагааг тэргүүлэх чиглэлээ болгодог.

Үүнийг хэрэгжүүлэхдээ улсын хилийн зурвас, боомт, бүс, хил орчмын нутаг дэвсгэрт улсын хилийн болон хил орчмын дэглэмийг сахиулах, зорчигч, тээврийн хэрэгслийг шалган нэвтрүүлэх, цэргийн, инженер-техникийн, мэдээлэл технологийн, тагнуулын, хилийн төлөөлөгчийн арга хэмжээг хослуулан явуулж улсын хил хамгаалалтыг зохион байгуулдаг.

1.Хууль тогтоомж, хилийн асуудлаар байгуулсан Монгол Улсын олон улсын гэрээ, хэлэлцээр, хилийн талаар баримтлах төрийн бодлогыг хэрэгжүүлэн, хил хамгаалалтын эрх зүйн орчныг боловсронгуй болгож, хуулиар хүлээсэн чиг үүргээ бүрэн хэрэгжүүлэх;

2.Хил хамгаалалтын арга, тактикийг хилийн нөхцөл байдал, бүсчилсэн хил хамгаалалтын онцлогт тохируулан өөрчилж, хилийн аюулгүй байдлыг хангах;

3.Улсын хилээр зорчигч, тээврийн хэрэгслийг шалган нэвтрүүлэх хүчин чадлыг нэмэгдүүлж, хилийн боомтын хяналт шалгалтын бүсийг ухаалга цахим гарц, дохиолол, хяналт, хамгаалалтын нэгдсэн системээр төхөөрөмжилж, аюулгүй байдлыг хангах;

4.Улсын хил хамгаалалтад ашиглах инженерийн байгууламжийг нэмэгдүүлж, орчин үеийн зэвсэглэл, техник технологийн ололтыг нэвтрүүлэх;

5.Хилийн хэсгийг өндөр хурдны шилэн кабелийн сүлжээнд холбож, хилийн албыг цахим болгон хөгжүүлж, дэд бүтцийг сайжруулах;

6.Хүний нөөцийн чадавхыг бэхжүүлж, улсын хилийг мэргэшсэн хилчдээр хамгаалах нөхцөлийг бүрдүүлэх;

7.Хилчдийн алба хаах нөхцөлийг хангаж, нийгмийн баталгааг сайжруулах.

Улсын хилийн халдашгүй дархан байдал, хил орчмын нутаг дэвсгэрийн аюулгүй байдлыг ханган, хилийн цэргийн байгуулалтыг хөгжүүлж, хил хамгаалалтын чадавхыг дээшлүүлнэ.

          Зорилго: Хил хамгаалалтын эрх зүйн орчинг боловсронгуй болгон, мэргэжлийн чиг хандлагад нийцүүлж, хил хамгаалалтын чадавхийг дээшлүүлэн, улсын хилийн халдашгүй дархан байдал, хил орчмын нутаг дэвсгэрийн аюулгүй байдлыг хангах